«Сир иччитэ»

Киһи уонна айылҕа… Киһи Ийэ Айылҕаҕа сыһыаныгар суруллубатах сокуоннар, уларыйбат үгэстэр олохтоммут эбиттэр.
Ону кэһии, Ытык Өбүгэлэр кэриэс-хомуруос тылларын толорбот буолуу туох-ханнык аана суох алдьархайга биһигини тиэрдиэ биллибэт.

Иҥсэ-обот аан дойду таһымыгар тахсан, ардай аһыылаах иҥсэ-мэнэгэйдэр уоттаах харахтара аны билигин тус хоту — бу биһиги диэкки хатаммыта тугунан-тугунан дьааһыйан тахсыа түгэҕэ көстүбэт!

Суруйааччы — Платон Ламутскай отут сыл анараа өттүгэр көтөхпүт тыын боппуруоһа кутургуйа курдук кууллайан-кууллайан, астанан-астанан дэлби ыстанара чугаһаатар-чугаһаан иһэр, ол боппуруос сибилигин ордук сытыырхайан, Аан Дойду проблематыгар кубулуйда.